ގދ. އަތޮޅު ކައުންސިލް ޤުރްއާން މުބާރާތް 2024ގެ ނިންމުމުގެ ރަސްމިއްޔާތު މާދަމާ ރޭ

ގދ. އަތޮޅު ކައުންސިލް ޤުރްއާން މުބާރާތް 2024ގެ ނިންމުމުގެ ރަސްމިއްޔާތު މާދަމާ ރޭ ބާއްވަން ކައުންސިލުން ދަނީ ފަހުގެ ތައްޔަރީތައް ވަމުންނެވެ. މި ރަސްމިއްޔާތު ކުރިޔަށް ދާނީ ތިނަދޫ ސްކޫލް ހޯލް ގައެވެ. 300  އަށް ވުރެ ގިނަ ދަރިވަރުންނާއެކު ”ގދ. އަތޮޅު ކައުންސިލް ޤުރްއާން މުބާރާތް “2024 ތިނަދޫ ސިޓީގައި ކަމިޔާބު ކަމާ އެކު މިހާރު ކުރިޔަށް އެބަދެއެވެ.

މުޅި ގދ. އަތޮޅަށް ހުޅުވާލައިގެން ކުރިއަށްދާ މި މުބާރާތުގައި އަތޮޅުގެ ސްކޫލް މަދަރުސާ، ޤުރްއާން ކްލާސް، އަމިއްލަ ފަރާތްތައް އަދި ޖަމްޢިއްޔާ ޖަމާއަތްތަކުން ވާދަކުރެއެވެ. މި މުބާރާތުގައި ފައުންޑޭޝަން ސްޓޭޖާއި، ކީސްޓޭޖު 01 އިން ކީސްޓޭޖު 05ގެ އިތުރުން ހާއްސަ އެހީއަށް ބޭނުންވާ ފަރާތް އަދި ޚާފިޒުންގެ ބައިން ވާދަކުރެއެވެ.

މި މުބާރާތް ކުރިއައް ދާނީ ނޮވެމްބަރ 06 އިން 09 ނޮވެމްބަރ 2024 އަށް އެމް.އެން.ޔޫ ތިނަދޫ ކެމްޕަހުގެ ހޯލްގައެވެ. މި މުބާރާތުގެ އެންމެފަހު ބައިވެރިންގެ ކިޔެވުން އޮންނީ މާދަމާ ހެނދުނު ދަންފަޅީގައެވެ. މި މުބާރާތުގައި ދީލަތި އެހީތެރިވާ ފަރާތްތަކުގެ އެހީތެރިކަން ވަނީ ލިބިފައިވެއެވެ.

މުޅި މުބާރާތުން އެއްވަނައަށް ދާ ފަރާތަށް ހުވަދުއަތޮޅު ދެކުނުބުރީ އަތޮޅު ކައުންސިލުން ވަނީ އުމްރާ ދަތުރެއް ދިނުމަށް ނިންމާފައެވެ. ހަމައެޔާއެކު ދެވަނައަށް ދާ ފަރާތަށް 5,000.00ރ (ފަސްހާސް ރުފިޔާ) ލިބިގެން ދާއިރު ތިންވަނަޔަށް ދާ ފަރާތަށް 3,000.00ރ (ތިންހާސް ރުފިޔާ) ދިނުމަށް ވަނި ހަމަޖެހިފައެވެ. އަދި މީގެއިތުރުން މުބާރާތުގެ ކޮންމެ ކެޓަގަރީއަކަށް ވެސް ވަނީ ފައިސާގެ އިނާމް ކަނޑައެޅިފައެވެ.